PMEGGramatiko / E-vortecaj vortetoj / E-vortecaj vortetoj tempaj /

14.2.2. Ankoraux

Ankoraux montras, ke sxangxo ne okazis gxis la koncerna tempo. Ofte ankoraux estas la malo de jam. Iafoje aliaj vortoj montras, ke estis same antauxe, kaj ankoraux nur emfazas tion, sed ofte ankoraux estas la sola, kiu montras, ke io ne sxangxigxis:

Legu pri la diferenco inter ankoraux kaj plu.

Aldona ankoraux «

Ofte ankoraux montras, ke al jam okazinta aldono aldonigxas plia aldono, aux ke okazinta kresko pludauxras, aux ke io, kio sxajnas impona, tamen ne estas la plej alta sxtupo, aux ke io, kio sxajnis esti la lasta, tamen ne estas la lasta:

  • Ekster tio el la diritaj vortoj ni povas ankoraux fari aliajn vortojn, per helpo de gramatikaj finigxoj kaj aliaj vortoj.[FE.30] Ni jam faris novajn vortojn, sed ni povas fari pliajn. Ne elcxerpigxis la ebloj krei novajn vortojn.

  • La ricxeco de tiu cxi homo estas granda, sed lia malsagxeco estas ankoraux pli granda.[FE.35] La ricxeco ne estas la plej granda afero. La malsagxeco estas pli granda. Ni ne atingis la maksimumon.

  • Ni nun ankoraux unu fojon ripetas, kion ni jam diris en alia loko.[OV.104] Al jam faritaj ripetoj aldonigxas unu plia ripeto.

  • Ili iris ankoraux kelkan distancon.[FA1.40] Ili jam antauxe iris kelkan distancon, kaj nun iris pli.

  • Tiu cxi punkto estas en miaj okuloj tre grava kaj poste mi ankoraux parolos pri gxi pli vaste.[OV.25] Al miaj antauxaj vortoj mi aldonos pliajn.

  • Li atendis ankoraux aliajn sep tagojn.[Gn.8] Li jam aldonis almenaux unu septagan periodon al sia atendado. Nun li aldonis plian septagan periodon.

Iafoje ankoraux vigle akcentas, ke ia elnombrado de aferoj ne cxesis, sed ke aldonigxas aliaj, iel similaj aferoj:

  • Al ni venas revizoro. [...] Revizoro el Peterburgo, inkognite; kaj ankoraux kun sekreta ordono.[Rz.5] Al la du unuaj, timigaj faktoj (venas revizoro, li venas inkognite), aldonigxas tria timiga fakto (li havas sekretan ordonon).


Dosierdato: 6 Novembro 2005 (07:11:57 GMT)